Boljoo Wordpad Notepad

Boljoo (Болзоо месенжер) чатын програмыг компьютертээ суулгахад түүнтэй дагалдан MNotePad, MWordPad гэсэн 2 программ хамт суудаг. Энэ хоёр программыг ашиглан монгол бичгийн текстийг компьютерт хялбархан шивж, шивсэнээ хэвлэж, хадгалж болох юм.
Boljoo программ нь өвөрмонголд өргөн хэрэглэгддэг Menksoft Mongolian IME программд түшиглэн бичигдсэн. IME нь "input method editor" гэсэн англи үгсийн товчлол бөгөөд латин үсэгтэй компьютерын гарыг ашиглан хятад, япон, солонгос, энэтхэг зэрэг хэлний үгсүүдийг бичих бололцоог өгдөг. Энэ технологи нь монгол бичгээр алдаа багатай, хурдтай бичих боломжийг олгоно.
Монгол бичиг эхлэн сурч буй хүмүүс ч энэ программыг ашиглаж чадах ба латин цагаан толгойн үсгүүдээр бичихийг хүссэн үгээ тааж бичихэд программ автоматаар байж болох хувилбаруудыг гаргаж ирэх бөгөөд тэрнээс зөвийг нь сонгон бичлэгтээ оруулах юм. Жишээ нь доорх зурагт "хайртай" гэсэн үгийг ингэж бичих болов уу? хэмээн тааж бичихэд доорх хувилбарууд гарч ирж байна:



IME буюу "Mongolian input method editor" цонхыг гаргаж ирэхийн тулд эхлээд хулганы баруун товчийг дарна. Дараа нь тэр цонхыг нээж, хаая гэвэл гарын shift товчийг дарахад хангалттай. Таамаглан бичсэн үг чинь зөв байвал space bar дээр даран текст рүүгээ оруулна. Харин бичсэн үг чинь буруу, харин гарч буй хувилбаруудад зөв бичигдсэн үг байвал түүний дээрх дугаартай адил тоог гараас дарахад тэр үг текст рүү сонгогдон орно. Үсгүүдийн байрлал, зарим нэг хослолын талаар илүү их мэдээллийг доорх зургаас авч чадна.



Би хувьдаа энэ программыг тун өндрөөр үнэлж байгаа. Хэл бичиг сурч буй хүүхэд багачууд, монгол хэлний багш нар, монгол хэл соёлоо дээдлэх хэн бүхэнд энэ программ хангамж тус болно гэдэгт итгэлтэй байна!